नेते

येण्यास वेळ नव्हता पाच वर्षे तुमच्याकडे
येतील नेते दारात आता, करुन रस्ते वाकडे

विझल्या साऱ्या मशाली आगही नाही कुठे
उरल्यात फ़क्त पणत्या, उरलेत काही काकडे

पाच वर्षांनी पुन्हा भरणार बाजार आता
आश्वासनांची भीक वाटत येतील ती माकडे

हात जोडुन शरण जा असतात नेते सर्वशक्ती
देव तुमचा हात जोडुन घालील त्यांना साकडे

कळतो व्यवहार त्यांना गणितही असतेच पक्के
प्रेतही मोजेल त्यांचे सरणातली लाकडे