|| कणा ||

ओळखलत का सर मला
पावसात आला कोणी
कपडे होते कर्दमलेले
केसावरती पाणी

क्षणभर बसला,नंतर हसला
बोलला वरती पाहून
गंगामाई पाहुनी आली
गेली घरटयात राहून

माहेरवाशीण पोरीसारखी
चार भिंतित नाचली
मोकळ्या हाती जाइल कशी
बायको मात्र वाचली

भिंत खचली,चूल विझली
होते-नव्हते गेले
प्रसाद म्हणुन पापण्यामध्ये
पाणी थोड़े ठेवले

कारभारणीला घेउन संगे सर,
आता लढतो आहे
पडकी भिंत बांधतो आहे
चिखल गाळ काढतो आहे

पैशाकड़े हात जाताच
हसत हसत उठला
पैसे नकोत सर
जरा एकटेपणा वाटला

मोडून पडला संसार
तरी मोडला नाही कणा
पाठीवरती हात ठेउन
नुसते लढ म्हणा...