कैफात त्या बुडालो

होतो कसा कळेना ,

होती नशा तुझ्या त्या

नजरेत जराजराशी . . .

मिटताच पापण्या का

दिसते मला सदा तू ?

का आठवात माझ्या

असते जराजराशी . . . ?

एकांत आसवांनी

माझा सजून जातो ,

डोळ्यांमधून माझ्या

तू सांडते जराजराशी .

भेटीत आपुल्या त्या

का ओढ होती युगांची ?

थांबलीस तू ही जाताना

तेव्हा जराजराशी . .

- मंगेश

विदेशी कपडे घातले तरी

हृदय अजून मराठी आहे

तोडून तुटत नाहीत

या मजबूत रेशीम गाठी आहेत

पिझा, बर्गर खाल्ल्यावरही

पोट पुरणपोळीच मागतं
ईंग्रजी पुस्तकं वाचली तरी

मन मराठी चारोळीच मागतं

मात्रुभूमि सोडली की

आईपासून दूर गेल्यासारखं वाटतं

भाषा सोडली की

अस्तित्व हरवल्यासारखं वाटतं

वडाची झाडं मोठी होऊनही

परत मात्रुभूमिकडे झुकतात

कितीही दूर गेलं तरी

पाय परत मात्रुभूमिकडेच वळतात

काहीही बदललं तरी

हृदय अजून मराठी आहे